Komuna teumado kaj senstreĉa babilado

La somero estas jam longe for, alvenis aŭtuno kaj lerno-, stud- aŭ labortempo por ĉiuj - kaj tio signifas, ke al ĉiuj okazis jam multo ekde la lasta renkontiĝo, estus do tempo por revido, ĉu?

Bonaj novaĵoj por konsentantoj: HEJ organizas kunveneton por senstreĉe pribabili la okazaĵojn (kaj ĉion alian), kaj ni elkore invitas ĉiujn interesiĝantojn, ankaŭ vin! Pri nivelo de lingvoscio ne zorgu, nek pri tio, se vi ankoraŭ neniun ĉeestonton konas – ni povas certigi, ke esperantistoj estas amikiĝemaj kaj malfermiĝemaj homoj. :-)

Pri la detaloj:

• la 13an de oktobro (ĵaŭde), de la 16a horo (laŭplaĉe "ĝis la nokto-nokto fin' " :P)
• en Budapeŝto, en la teumejo Sirius (VIIIa distrikto, strato Bródy Sándor, numero 13)

Gravas:

1. Por ke ni povu reservi lokon, necesas, ke ĉiu ĉeestonto trinku almenaŭ unufoje teon surloke aĉetitan. Pri prezoj kaj elekteblecoj vi povas informiĝi ĉe la retpaĝo de la teumejo.
2. Se vi volonte ĉeestus, bonvolu sendi retmesaĝon al la adreso sarolta punkto bago @ esperanto-junularo punkto hu. Tio necesas por ke ni sciu, por kiom da personoj ni reservu lokon/tableton.
3. Se vi havas problemon, ekz. vi ne trovas la teumejon Sirius, trankvile telefonu al Saci (tridek 380 4784).

Ni atendas vian anonciĝon! :-)

teamo de HEJ

Raporto pri IJS

IJS tre sukcese okazis en la Valo de la Malĝojego, kiu ja ŝajnis ege gaja kaj mojosa loko :) Jen ni elektis por vi kelkajn fotojn pri la aranĝo, por rememorigi, aŭ por konvinki vin, ke sekvontfoje ja venu. Por vidi la fotojn klaku ĉi tien!

Ĉi sube vi povas legi la raporton de tutnova partoprenanto TÓTH Teodóra, pri la aranĝo.

*

Ĉiuj verkoj pri la unua Esperanta renkontiĝo de la aŭtoro ĝenerale komenciĝas per tio, ke "Mi estis iomete nevoza" aŭ "Mi tre maltrankvilis". Poste kompreneble evidentiĝas, ke mankis la kialo de la komenca malbonfarto, ĉar ĉiuj estis karaj. Do oni kutime tre bone amuziĝas kaj multajn novajn amikojn ekkonas dum la aranĝo.
Komence mi pensis, ke mi ĉiukaze kreos pli unikan raporton, sed mi malkovris, ke ne gravas kiom mi klopodas, ankaŭ mia rakonto komenciĝos per tio ke "Mi estis iomete nervoza" – fakte konsiderante mian kompatindan Esperanto-scion, tio tute ne estas senkiala. Post la komenca nervozeco mi kompreneble pli kaj pli bone fartis; ĉiuj estis karaj, mi ekkonis multajn interesajn homojn kaj la programo estis vere bonega. La amuzaj ludoj, ekskursoj, koruso, aŭkcio, la hungara kaj la internacia vesperoj, la kuirado de gulaŝsupo kaj la kursoj ĉiuj estas neforgeseblaj memoroj.

IJS konvinkis min, ke indas daŭrigi la lernadon de la lingvo, kaj malgraŭ la nomo, la Valo de Malĝojego estas tamen gaja loko.

(originale en la hungara)